ඇමෙරිකාවේ ජාතික පාපන්දු ලීගය බීට්ස් තහනම් කරයි [Updated]

No comments
ඇමෙරිකාවේ ජාතික පාපන්දු ලීගය බීට්ස් තහනම් කරයි
ඇමෙරිකාවේ ජාතික පාපන්දු ලීගය විසින් එහි ක්‍රීඩකයින්ට කැමරාවට හසුවන අවස්තාවල දී බීට්ස් වෙළඳනාමය සහිත Headphone භාවිත කිරීම තහනම් කොට තිබෙනවා.මේ අනුව මෙම ක්‍රීඩකයින්ට රෑපවාහිනී සම්මුඛ සාකච්ඡා,පුහුණුවීම් අතරතුර,තරග පවත්වන දිනයන්හි සහ තරගය නිමාවී විනාඩි 90 ක් ගත වන තෙක්  බීට්ස් උපාංග භාවිතය තහනම් කොට තිබෙනවා.

මීට හේතු වී ඇත්තේ තවත් මෙවන් Headphone නිෂ්පාදනය කරන සමාගමක් වන Bose සමාගම විසින් මෙම තරගාවලිය සඳහා අනුග්‍රහය දැක්වීම ය.ජාතික පාපන්දු ලීගයේ 1990 වසරේ සිට අනුගමනය කරන ප්‍රතිපත්තිවලට/පිළිවෙතට අනුව Bose සමාගමට හැකියාව පවතිනවා රෑපවාහිනී සම්මුඛ සාකච්ඡාවන්හි අදාළ ක්‍රීඩකයින්ට සහ පුහුණුකරුවන්ට වෙනත් වෙළඳනාමයක් සහිත උපාංග භාවිත කිරීමෙන් වැළැක්වීමට.

මෙසේ බීට්ස් උපාංග තරගයක දී තහනම් කළ ප්‍රථම අවස්ථාව මෙය නොවේ.මීට පෙර ද Sony සමාගම සමඟ එළඹුණු ගිවිසුමකට අනුව FIFA විසින් පසුගිය ලෝක කුසලාන පාපන්දු තරගාවලියේ දී මාධ්‍ය සාකච්ඡා සඳහා බීට්ස් උපාංග භාවිත කිරීම තහනම් කොට තිබුණා.



බීට්ස් සමාගම වෙළඳ දැන්වීම් සහ බීට්ස් උපාංග ප්‍රචාරණය සඳහා විශාල මුදලක් වියදම් කරන අතර සමහර ගායක ගායිකාවන්,නළු නිළියන්,ක්‍රීඩකයින් වැනි ප්‍රසිද්ධ අය මහජනයා ඉදිරියේ බීට්ස් උපාංග භාවිත කිරීම වෙනුවෙන් ඔවුනට ගෙවීමක් කරනු ලබනවා.තව ද පර්යේෂණ ආයතනයක් වන 'NPD Group' විසින් කරන ලද පර්යේෂණයකට අනුව ඇමෙරිකානු ඩොලර් 100න් ඉහළ Headphone වෙළඳපොළේ 61% ක වටිනාකමකින් යුතු බීට්ස් උපාංග පවතින අතර මෙහි Bose වෙළඳනාමය සහිත උපාංග පවතින්නේ 22%ක් පමණි.ඒ අනුව බලන විට බීට්ස් සමාගමට මෙය එතරම් පාඩුවක් නොවන බව විචාරකයින් පවසන අතර බීට්ස් සමාගම ආරම්භයේ පටන් බීට්ස් උපාංග ක්‍රීඩකයින් සඳහා අත්‍යාවශ්‍ය උපාංගයක් බවට ප්‍රචාරණය කරනු ලැබුවා.


ඇමෙරිකාවේ ජාතික පාපන්දු ලීගය බීට්ස් තහනම් කරයි


ඇපල් සමාගම පසුගිය මැයි මස බීට්ස් ඉලෙක්ට්‍රෝනික් සමාගම ඇමෙරිකානු ඩොලර් බිලියන 3 කට මිළදී ගනු ලැබුවා.මෙය ඇපල් සමාගම විසින් වෙනත් සමාගමක් මිළදී ගැනීමට ආයෝජනය කළ වැඩි ම මුදල සහ කලින් එසේ වෙනත් සමාගම් සඳහා ආයෝජනය කළ මුදල්වල එකතුවට වඩා වැඩි ද වනවා.

Update 1

ඇපල් සමාගම ලබන සතියේ සිට Bose වෙළඳනාමය යටතේ ඇති සියලු ම උපාංග අලෙවි කිරීම,ප්‍රදර්ශනය කිරීම සහ ඇපල් Retail Store වල ඇපල් උපංග සමඟ භාවිත කිරීම නවතා දැමීමට සූදානම් වන බව විශ්වාසලත් ආරංචි මාර්ග පවසනවා.මීට හේතු ලෙස මේ වන තෙක් නිල වශයෙන් තොරතුරු ලැබී නැතත් පසුගිය කාල වකවානුවේ ඇතිවුණු සිදුවීම් කිහිපයක් මීට හේතු විය හැකි බව පැවසෙනවා.එනම්

  • Bose සමාගම විසින් නිෂ්පාදනය කෙරෙන QuietComfort headphone පෙළ තුළ අන්තර්ගත වන noise-canceling තාක්ෂණය සඳහා එම සමාගම පේටන්ට් බලපත්‍රයක් ලබා ගෙන සිටින අතර බීට්ස් සමාගමේ "Studio" සහ "Studio wireless" headphone සඳහා භාවිත වන Adaptive Noise Cancellation තාක්ෂණය Bose සමාගමට අයත් එම පේටන්ට් බලපත්‍රයක් උල්ලංගනය කර ඇති බව පවසමින් පසුගිය ජූලි මස නඩුවක් ගොනු කොට තිබීමත් 
  • Bose සමාගම NFL(ජාතික පාපන්දු ලීගය) සමඟ ඇතිකරගත් ගිවිසුමට අනුව තරගය තුළ බීට්ස් උපාංග තහනම් කිරීමත් එසේ බීට්ස් උපංග තරගය තුළ තහනම් කොට තිබිය දී ඇමෙරිකානු ජාතික පාපන්දු ක්‍රීඩකයෙකු වන  Colin Kaepernick විසින් පසුගිය ඉරිදා පැවති මාධ්‍ය සාකච්ඡාවක දී පියයුරු පිළිකා පිළිබඳ දැනුවත් කිරීම තේමා කරගත් බීට්ස් headphone එකක් භාවිත කිරීම නිසා ඔහුට ඇමෙරිකානු ඩොලර් 10,000 ක දඩයක් ද නියම කරනු ලැබීමත් බව වැඩිදුරටත් සඳහන් වනවා.

තවද ඇපල් සමාගම බීට්ස් සමාගම මිළදී ගැනීමෙන් පසු බීට්ස් උපාංග තම Reatail Store වල සහ මාර්ගගත ගබඩාව තුළ වැඩි වශයෙන් ප්‍රවර්ධනය කිරීමට ද කටයුතු කොට තිබුණා.

Update 2
Bose සමාගම බීට්ස් උපාංගවල දක්නට ලැබෙන Noise Cancellation තාක්ෂණයට එරෙහිව ගොනු කර තිබූ නඩුව ඉල්ලා අස්කොටගෙන තිබෙනවා.මේ සම්බන්ධව ඇපල් සමාගම හෝ බීට්ස් සමාගම මේ වන තෙක් ප්‍රතිචාර දක්වා නැත.

No comments :

Post a Comment

මෙම ලිපිය පිළිබඳව ඔබට හිතෙන දේ මෙහි Comment කරන්න.යාළුවන්ටත් දැනගන්න Share කරන්න.